Repository logo

Browsing by Author "Qwabe, Thembinkosi Blessing."

Filter results by typing the first few letters
Now showing 1 - 2 of 2
  • Thumbnail Image
    Item
    Ukukhononda ezinkondlweni zika- JC Dlamini ezibhalwe ngesikhathi sobandlululo.
    (2015) Qwabe, Thembinkosi Blessing.; Sibiya, Nakanjani Goodenough.
    Lolu cwaningo lubheka ukukhononda ezinkondlweni zika-J.C.Dlamini azibhale ngesikhathi sobandlululo eNingizimu Afrika. Lucwaninga indikimba yokukhononda ezinkondlweni zakhe luveze ukuthi kwakuyiziphi izinto ayekhononda ngazo; imaphi amasu awasebenzisa ukubhala lezo zinkondlo kanye nezinhloso zakhe zokubhala lezo zinkondlo. Ngale kokuveza izinto ayebhala ngazo, lubuye luveze namasu awasebenzisile ukubhala lolu hlobo lwezinkondlo ngesikhathi lapho umbuso wobandlululo wawukwenze kwaba nzima khona kubabhali ukuba babhale ngokukhululeka. Luveza isibindi nobuchule bakhe ekubhaleni izinkondlo ezinendikimba yokukhononda. Ucwaningo lusebenzisa ithiyori ye-Marxism kanye neye-Post-colonialism. La mathiyori akwenza kube lula ukwenza lolu cwaningo ngokubheka ubudlelwane phakathi kwezinkondlo zika-J.C.Dlamini kanye nesikhathi ezibhalwe ngaso. Lubalulekile lolu cwaningo ngokuchitha imibono yabanye abacwaningi ababopha ngabhande linye bathi imibhalo yesintu ayikwazanga ukuveza impilo yabantu ngezikhathi zobandlululo; ubuhlungu, usizi, ukuhlushwa nokubandlululwa kwabantu ababecindezelwe. Luveza okwakwenzeka ngaleso sikhathi nokuthi abantu abamnyama bathwala kanzima kangakanani.
  • Thumbnail Image
    Item
    Ukuvezwa kwezinselelo zesikhathi senkululeko emanovelini esizulu ashicilelwe kusukela onyakeni we-1994 kuya kowezi-2014.
    (2019) Qwabe, Thembinkosi Blessing.; Sibiya, Nakanjani Goodenough.
    Lolu cwaningo lubheka izinselelo ezivezwa ngamanoveli aqokelwe lolu cwaningo. Lapha kubhekwa amanoveli ashicilelwe eminyakeni yokuqala yenkululeko engamashumi amabili. Ezinselelweni ezivezwa ucwaningo kukhona ubugebengu, inkohlakalo, ukungahlonishwa kwabantu besifazane, ukucwasana nokubandlululana ngokobuzwe nobuhlanga, ukungamukeleki kahle kwabathandana bewubulili obufanayo, udlame oludlangile ezweni, ubuphofu kanjalo nokungalingani komphakathi weNingizimu Afrika entsha. Lolu cwaningo luveza futhi izizathu ezenza ukuba ababhali bamanoveli ababhale ngale minyaka egaguliwe babhale ngokukhululeka. Luphawula ngokufikakwesikhathi soguquko ezweni laseNingizimu Afrika, kwangena intando yeningi nomthethosisekelo omusha ongacwasi ngokwebala, ubuhlanga, inkolo nobulili. Kuyavela ukuthi ukuguquka kwesimo sezombusazwe kunikeze ababhali inkululeko yokubhala bengenalo uvalo lokuboshwa nokuvalwa umlomo bona qobo lwabo noma imisebenzi yabo ngoba uhulumeni eyibuke wangayithanda. Ucwaningo luveza nezimbangela zezinselelo ezivezwe ngababhali njengoba zitholwe umcwaningi emanovelini. Lubuye luveze nokuthi yiziphi izixazululo ezihlongozwa ngababhali bala manoveli. Lokhu kubalulekile ngoba kulindelekile ukuba imibhalo yababhali ingagcini nje ngokuveza izinkinga nezinselelo kepha ibuye ihlongoze izixazululo ababhali abacabanga ukuthi zingasiza kuleso simo abasuke besivezile emibhalweni. Luveza namasu obuciko asetshenziswe ngababhali bamanoveli aqokiwe ngesikhathi beveza izinselelo emibhalweni yabo. Ucwaningo lusebenziseinjulalwazi ye-Marxism neye-Post-colonialism. Lezi zinjulalwazi zikwenza kube lula ukwenza lolu cwaningo ngokubheka ubudlelwane phakathi kwamanoveli aqokiwe kanye nesikhathi leso abhalwe ngaso. Lusebenzise indlela yeKhwalithethivu, ehlonzwe njengefanele ukwenza lolu cwaningo. Le pharadaymu ilekelelwe yileyo eyaziwa ngokuthi iPharadaymu Ehumushayo. Lubalulekile lolu cwaningo ngoba luveza ubudlelwane phakathi kwemibhalo okucwaningwe ngayo lapha kanye nesikhathi seminyaka yokuqala engamashumi amabili yenkululeko ezweni laseNingizimu Afrika. Kubalulekile ukuveza kwalo ukuthi zikhona izinselelo ezintshaneziqukethwe yizindikimba ezintsha ebekungelula ukubhala ngazo ngesikhathi sobandlululo noma ebezingekho ngaleso sikhathi.