Ucwaningo lwemibono yothisha nabafundi bebanga leshumi nanye besiZulu ulimi lwasekhaya ngosiko lokuthwala amantombazane esikoleni esikwaNdengezi.
Loading...
Date
2021
Authors
Journal Title
Journal ISSN
Volume Title
Publisher
Abstract
ISIFINGQO
Inhloso yalolu cwaningo ukubheka ukuthi othisha nabafundi besiZulu ulimi lwasekhaya bebanga le-11
banamiphi imibono ngesiko lokuthwala. Lolu cwaningo luhlose ukuphendula imibuzongqangi emithathu
yalolu cwaningo ethi: (a) Othisha besiZulu ulimi lwasekhaya bebanga le -11 banamiphi imibono ngesiko
lokuthwala esikoleni esiKwaNdengezi esikoleni? (b) Abafundi besiZulu ulimi lwasekhaya bebanga le-11
banamiphi imibono ngesiko lokuthwala esikoleni esiKwandengezi? (c) Zizathu zini ezenza othisha nabafundi
babuke isiko lokuthwala ngendlela abalibuka ngayo esikoleni esiKwaNdengezi?
Lolu cwaningo lwenziwa esikoleni samabanga aphezulu endaweni yaKwaNdengezi. Lapho abahlanganyeli
balolu cwaningo kwakungothisha ababili abafundisa isiZulu ulimi lwasekhaya kanye nabafundi
abayisishiyagalombili, abafana abane namantombazane amane abafunda isiZulu ulimi lwasekhaya.
Lolu cwaningo lusebenzise indlela yekhwalithethivu ngaphansi kwepharadaymu egxekayo (critical paradym)
ngoba lepharadaymu ibuka umhlaba ngeso lokuletha ushintsho kumbe ilethe intuthuko esimweni senhlalo
yabantu. Ngalokhu kuhloswe ukuthi uma abantu befunda lo mbhalo bashintshe indlela abaqhuba ngayo leli
siko. Lolu cwaningo liwucwaningo lwesimo (case study). Ulwazi luqoqwe ngokusebenzisa izingxoxo
ezisakuhleleka (semi-structured interviews) kanye nezingxoxo zamaqembu (Focused groups). Kulolu
cwaningo kusetshenziswe injulalwazi yefeminizimu nemaksizimu. Ngisebenzise lezi zinjulalwazi ngoba
zombili lezi zinjulalwazi zilwela ukuthi kube khona ubudlelwane obuhle phakathi kwemiphakathi ehlalisene.
Kusetshenziswe nohlaka lwemicabango lapho kusetshenziswe amakhonsephthi ukuhlaziya ulwazi
olutholakele.
Ziyishumi nantathu izindikimba ezigqamile kulolu cwaningo olwazini olutholakele. Imibono yothisha
nabafundi ngesiko lokuthwala iveze izindikimba ezilandelayo: indikimba yokuqala ithi: isiko lokuthwala
nokuphazamisa umsebenzi kathisha nowomfundi. Izingane ezithwaliwe ziyalova, zikhulelwe bese ziphoqeleka
ukuba ziyeke isikole. Eyesibili imayelana nesiko lokuthwala nokuqhutshwa kobugebengu. Lobu bugebengu
bumbandakanya ukuthumba, ukudlwengula kanye nokuhlukunyezwa kwamalungelo abantu besifazane.
Eyesithathu indikimba iveza isiko lokuthwala nokuba nemali. Abantu abathwala izingane zamantombazane
ngoba banemali baheha abazali bazo ngemali. Eyesine indikimba imayelana nabasemagunyeni nokuthwalwa
kwezingane zamantombazane. Le ndikimba iveza ukuthi iziphathimandla azenzi lutho ukunqanda leli siko
ngoba zilibona kuyisiko elihle kanti nazo ziyaleza leli siko. Eyesihlanu indikimba ibalula ukuthi isiko
lokuthwala alisahambisani nesikhathi esiphila kuso manje. Leli siko libukeka seliphelelwe isikahathi.
Indikimba yesithupha iveza ukuthi abazali abazivikeli izingane zabo. Le ndikimba ikhombisa ukuthi abazali
abazivikeli izingane zabo kuleli siko kunalokho bavele bavumelane nabenzi baleli siko. Eyesikhombisa
abafundi nencazelo zabo ngesiko lokuthwala kanye nemithelela yalo. Lapha kuvela izindlela ezintsha
esekwenziwa ngazo leli siko.
Eyesishiyagalombili indikimba iveza isiko lokuthwala nokuhlukunyezwa kwamalungelo abantu besifazane. Le
ndikimba ikhombisa ukuthi abantu abadala abathwala izingane ezincane zamantombazane bayazihlukumeza
ngezindlela eziningi ngendlela yokuthi bathwala izingane zamantombazane ngaphandle kwemvume yazo.
Indikimba yesishiyagalolunye mayelana nabafundi nalwazi ngabake bathwala. Le ndikimba iveza ulwazi
abafundi abanalo mayelana namantombazane ake athwalwa. Yilapho kuvela khona ubuhlungu obuzwiwa
abasondelene nezisulu zaleli siko. Eyeshumi imayelana nokubukelwa phansi komuntu wesifazane
emphakathini. Le ndikimba iveza ukuthi ukuganiswa kwezingane zamantombazane ngempoqo kuyinkomba
yokungalingani ngokobulili emphakathini. Eyeshumi naye umendo njengento ebaluleke kakhulu kubantu
besifazane. Le ndikimba iveza ukuthi abazali benikela ngezingane zabo kubantu abangabazi ngoba wonke
umzali ufuna ukuthi ingane yakhe igane. Eyeshumi nambili imayelana nezinga eliphansi lemfundo
yamantombazane. Le ndikimba iveza ukuthi amantombazane ayizisulu zesiko lokuthwala agcina
engasiqedanga isikole. Eyeshumi nantathu iveza indlela abazizwa ngayo labo abasondelene nezisulu. Le
ndikimba iveza ukuthi isiko lokuthwala alihlukumezi izisulu kuphela kodwa nalabo abasondelene nezisulu.
Ucwaningo luphetha ngokuthi kumele kuhlangane zonke izinhlaka zemiphakathi kukhulunywe ngemiphumela
emibi yaleli siko bese kushaywa imithetho eqeda leli siko ngoba liyisiko elinesihluku futhi licindezela
amalungelo abantu besifazane
Description
Master’s Degree. University of KwaZulu-Natal, Durban.